Flokksfélögin í hverju kjördæmi hafa með sér samstarfsvettvang sem kallast kjördæmissamband, nema í Reykjavík þar sem að þessi vettvangur kallast fulltrúaráð framsóknarfélaganna. Kjördæmissamböndin hafa umsjón með og/eða frumkvæði að flokksstarfi í kjördæminu. Til þeirra kasta koma þó fyrst og fremst sameiginleg mál eins og stefnumótun um málefni kjördæmisins, útgáfa flokksblaða í kjördæminu, samskipti við flokksforystuna og þingflokkinn og fleira þess háttar. Formenn kjördæmissambanda eiga sæti í landsstjórn flokksins.

Kjördæmissamböndin standa fyrir framboði til Alþingis í sínu kjördæmi þ.e. þau ákveða hvaða aðferð skuli nota við val á frambjóðendum, sjá um framkvæmd hennar og bera listann formlega fram. Þau sjá síðan um skipulagningu og rekstur kosningabaráttunnar á sínu svæði. Samböndin halda kjördæmisþing í október eða nóvember ár hvert. Það sækja trúnaðarmenn flokksins í kjördæminu og fulltrúar aðildarfélaga sambandsins (oftast einn fyrir hverja 10 félagsmenn). Þar er farið yfir starfið á liðnu ári, línurnar lagðar fyrir það næsta og ályktað um málefni kjördæmisins eða stjórnmálaástandið almennt. Þar eru einnig kjörnir fulltrúar í miðstjórn flokksins til eins árs í senn.  Fjöldi þeirra fer eftir fjölda félagsmanna í kjördæminu.