Á góðri ferð

Ég hef haldið áfram formannsferð minni um landið og heimsótti ég tvö bæjarfélög nú í vikunni, Hafnarfjörð og Mosfellsbæ. Það skemmtilegasta sem stjórnmálamaðurinn gerir er að sækja heim fólkið og heyra hvað brennur á því. Ég ræddi við bæjarstjóra þessara sveitarfélaga og kynnti mér það sem helst er í gangi hjá þeim og á sveitarstjórnarstiginu. Ég fór í Flensborgarskólann í Hafnarfirði og talaði við menntaskólafólkið, ég dáist af því hve unga fólkið er skarpt og beitt í sinni pólitísku hugsun. Við Íslendingar höfum svo sannarlega byggt upp gott og framsækið þjóðfélag með kraftmikilli æsku. En að mörgu þarf að hyggja og er það reyndar stöðugt verkefni okkar allra. Í hinni hátæknilegu Actavis verksmiðju er viðhöfð fagmennska í hvívetna. Einstaklega gaman var svo að hitta fólkið á Hrafnistu.

í Mosfellsbæ kynnti ég mér starfsemi Reykjalundar og Dvalarheimilis aldraðra. Ég kom við í Lágafellsskóla þar sem ég hitti kennarana og grunnskólanemendur. Það var gaman að sjá að búið var að mála heilan vegg í grænum stöfum sem á stóð „samvera, samkennd og samvinna“. Það er mikilvægt að unga fólkið geri sér grein fyrir þeim gríðarlega krafti sem felst í þessum einkunnarorðum okkar framsóknarmanna og ánægjulegt að sjá skólastarfið í svo miklum blóma hjá krökkunum í Mosfellsbænum.

Haustfundur

Nú um helgina verður haldinn haustfundur þingflokksins og landsstjórnarinnar á Húsavík þar sem við þingmenn flokksins komum saman ásamt trúnaðarmönnum og ræðum komandi þing og þau mál sem fyrir liggja. Framsóknarflokkurinn hefur mörg mikilvæg mál fram aða færa fyrir íslenska þjóð og samfélag og munum við leggja okkar á vogarskálar til að vernda kaupmátt , atvinnu, húsnæði og hagsmuni fólks og fyrirtækja á þessum erfiðu tímum í efnahagslífinu. Því miður situr daufgerð stjórn athafnaleysis í stjórnarráðinu og hefur siglt með okkur inn á hættuleg mið. Við framsóknarmenn höfum lagt fram efnahagstillögur frá því í fyrra sem hefðu tryggt hér mýkri lendingu ef eftir þeim hefði verið farið, það sýna staðreyndir. Verðbólgan var hér á niðurleið þegar við fórum úr ríkisstjórn, við vorum að ná tökum á henni, rétt eins og 1999 og 2003. Það bar að stíga á bremsurnar hér eftir kosningarnar 2007. Ríkisstjórnin fór sínu fram og lagðist ekki í þann undirbúning að íslenskt efnahagslíf væri búið undir væringar á alþjóðamörkuðunum. Þvílík ríkisstjórn!

 

Þingályktun um Efnahagsráð Íslands

Ríkisstjórnin verður að vakna! Afar brýnt er að tekið verði á þessum efnahagsvanda af festu og ákveðni. Þau eru svo djúptæk og víðfeðm að á þeim verður ekki fundin viðunandi lausn nema þjóðin í heild taki höndum saman. Takist það ekki munu afleiðingarnar blasa við innan tíðar í dýpri efnahagskreppa, meiri kjaraskerðingu og stærri áföllum heimila og atvinnulífs en ásættanlegt er.

Ég mun á nýju þingi beita mér fyrir þingsályktun um að þegar í stað verði myndaður samráðsvettvangur helstu aðila samfélagsins sem hafi það að verkefni að leita hagfelldustu leiða út úr þeim efnahagskröggum sem þjóðinni hefur verið stýrt inn í. Í þessum hópi verða forystumenn stjórnmálaflokkanna, fulltrúar atvinnulífsins, launþega, sveitarfélaga, fjármálafyrirtækja og Bændasamtaka Íslands. Þessum hópi til fulltingis verður úrval sérfræðinga á sviði efnahagsmála frá Seðlabankanum, Hagfræðistofnun Háskóla Íslands, erlendum sérfræðistofnunum og háskólum.

Ég legg til að þessum hópi verði falið að samræma leiðir út úr efnahagsvandanum og leggja grunn að styrku íslensku efnahagslífi til frambúðar sem hefur að leiðarljósi að styrkja útflutning og framleiðslu atvinnulífsins og þjóðarsparnað. Hlutverk hópsins á ekki að vera pólitísk togstreita. Verkefnið er fyrst og fremst tæknilegs eðlis og hefur það markmið að koma á jafnvægi á þjóðarbúskap Íslendinga, bæði til skamms og langs tíma. Það er mjög mikilvægt að nú verði tekið á málunum og aðgerðaleysisstefnan lögð til hliðar. Annað er hreinlega ekki hægt.

Guðni Ágústsson, formaður Framsóknarflokksins