Sjávarútvegur

1. Framsókn styður við hlutdeildarkerfi í sjávarútvegi þannig að fiskveiðum sé stýrt í kvótum eins og gert er í dag enda hefur slíkt fyrirkomulag skapað mikil verðmæti fyrir þjóðarbúið.   

2. Framsókn telur eðlilegt að sjávarútvegurinn greiði sanngjarnt veiðigjald fyrir nýtingu á sameiginlegum auðlindum þjóðarinnar.  

3. Framsókn telur mikilvægt að regluverk um allar tegundir sjávarfangs sé skýrt til að tryggja aukna arðsemi af fjölbreyttri nýtingu þeirra auðlinda sem finnast í hafinu við Ísland.  

4. Framsókn vill að byggðaúrræði fiskveiðistjórnunarkerfisins verði nýtt áfram á ábyrgan hátt. Þær aflaheimildir sem ríkið hefur árlega til afnota til atvinnu-, félags- og byggðaúrræða þurfa að vera markvisst nýtt til að tryggja byggðafestu í viðkvæmustu byggðunum.   

Rannsóknir, nýsköpun og þróun í sjávarútvegi 

1. Framsókn leggur áherslu á að efla rannsóknir á fullnýtingu sjávarafla og lífmassa, svo sem þangi, þörungum, krabba- og skeldýrum. 

2. Framsókn telur mikilvægt að styðja við nýsköpunar- og þróunarsetur á landsbyggðinni í samstarfi við skóla og rannsóknastofnanir. 

3. Framsókn vill yfirfara lög og reglugerðir um nýtingu vannýttra tegunda til að auka fyrirsjáanleika og skapa hvata fyrir frumkvöðla. 

Fiskeldi  

1. Framsókn styður fiskeldi á sjó og landi og vill ná víðtækri sátt um þaði með skýrri lagaumgjörð, vísindalegum rannsóknum og virku eftirliti. 

2. Framsókn leggur áherslu á að uppbygging fiskeldis taki mið af byggðasjónarmiðum og skili ávinningi til nærsamfélaga. 

3. Framsókn telur mikilvægt að fiskeldissjóður styðji sveitarfélög þar sem starfsemin fer fram. 

Tækifæri og nýsköpun 

1. Framsókn sér tækifæri í því að Háskólar og rannsóknarstofnanir vinni náið með iðnaðinum að rannsóknum og nýsköpun, sem gagnast bæði vísindasamfélaginu og atvinnulífinu.  

2. Framsókn vill nýta sterka stöðu Íslands í tæknigeiranum og rannsóknum til að þróa nýjungar í fiskeldi. Það getur falið í sér betri fóðurþróun, sjúkdómavarnir og sjálfbærar eldisaðferðir sem minnka umhverfisáhrifin og auka lífvænleika framleiðslunnar. 

Ábyrg matvælaframleiðsla 

1. Framsókn telur að með áherslu á sjálfbærni og velferð fiska getur íslenskt fiskeldi sýnt fram á hvernig hægt er að framleiða matvæli á ábyrgan hátt. Þetta stuðlar að sjálfbærri þróun og getur veitt Íslandi forskot á alþjóðamörkuðum sem eftirsóknarverðan uppruna hágæða fiskeldisvara.   

Laga og reglugerðaumhverfi

1. Framsókn leggur áherslu á gagnsæi í eignarhaldi fiskeldisfyrirtækja. Brýnt er að skoða hvernig takmarka megi samþjöppun eignarhalds aðila í fiskeldi á Íslandi og hvort takmarka eigi með einhverjum hætti eignarhald erlendra aðila á eldisleyfum á Íslandi. Mikilvægt er að horfa til þróunar í nágrannalöndum í þeim efnum. 

2. Framsókn telur nauðsynlegt að umgjörð og lagaumhverfi fiskeldis sé skýrt, skilvirkt og byggi á traustum rannsóknum. Starfsemi í fiskeldi taki mið af umhverfis- , loftslags-, heilbrigðis- og byggðasjónarmiðum. Mikilvægt er að rannsóknir séu fullnægjandi og eftirlit með fiskeldi sé virkt.  

3. Framsókn vill tryggja að til þess bærir vísindamenn séu fengnir til að rýna aðferðafræði sem Hafrannsóknastofnun notar við mat á burðarþoli, við gerð áhættumats og eftirlit með landeldi.  

4. Framsókn vill tryggja virkt eftirlit með starfseminni og telur mikilvægt að eftirlitsaðilar verði staðsettir í nálægð við starfsemina. 

5. Framsókn vill skýra heimildir til eðlilegrar gjaldtöku af fiskeldi. Brýnt er að gjaldtaka af fiskeldi hamli ekki uppbyggingu og samkeppnishæfni greinarinnar. Sérstaklega skal horfa til aðlögunar nýliða og getu minni aðila sem njóta síður stærðarhagkvæmnis að standa undir gjöldunum. 

Verndun villtra stofna og veiðiréttindi 

1. Framsókn leggur áherslu á að vernda villta laxastofninn og tryggja að líffræðilegum fjölbreytileika í ám og vötnum sé ekki ógnað.  

2. Framsókn vill tryggja eftirlit með seiðasleppingum. Samþjöppun veiðiréttinda, m.a. með stórfelldum jarðakaupum einstaklinga eða félaga þarf að taka sérstaklega til skoðunar. Mikilvægt er að stjórnvöld fari þar einnig fram með góðu fordæmi. 

Hvalveiðar 

1. Framsókn styður sjálfbærar hvalveiðar. Líkt og með aðrar atvinnugreinar þarf að tryggja fyrirsjáanleika í atvinnugreininni fyrir þá sem hana stunda og að starfað sé sem samkvæmt lögum. 

Strandveiðar  

1. Framsókn leggur áherslu á að strandveiðikerfið sé endurskoðað þannig að strandveiðimenn um allt land hafi sömu tækifæri til veiða. Horfa verði til svæðisskiptingar og úthlutun á heimildinni samkvæmt henni. 

Skattar og gjöld renni til nærsamfélaga

1. Framsókn telur að gjöld tengd sjávarútvegi og fiskeldi séu í eðli sínu landsbyggðartengd. 

2. Framsókn vill tryggja að slíkar tekjur renni aftur til nærsamfélaga. 

3. Framsókn vill móta skattalega umgjörð svo ávinningur af orkuframleiðslu og annarri auðlindanýtingu skili sér í ríkari mæli til heimabyggða. 

Samþykkt á 38. Flokksþingi Framsóknar í Reykjavík 14.-15. febrúar 2026.