Farsæld Íslands

Farsæld verður til í samvinnu fólks og slík nálgun hefur þjónað Íslandi vel. Samvinnuhugsjónin er grjóthörð aðferðafræði sem virkar. Hún felur í sér að hlusta, setja markmið og ná samkomulagi um framkvæmd. Samvinna býr til traust milli aðila og fyrir vikið verða ákvarðanir farsælli, sem undirbyggir betra samfélag.

Stærsta áskorun heimila og fyrirtækja er enn há verðbólga og vextir. Háar verðbólguvæntingar búa til óvissu, sem dregur úr ráðstöfunartekjum og fjárfestingum og hægir á allri uppbyggingu. Við erum þegar farin að sjá skýr merki þess á fasteignamarkaði. Það dugar ekki að setja fram „plan“ án þess að kalla lykilaðila að borðinu. Samvinnuleið í efnahagsmálum felur í sér trúverðuga hagstjórn, hófsemi í opinberum útgjöldum, aðhald sem styður verðbólgumarkmið og samtal sem skapar stöðugleika á vinnumarkaði. Jafnframt þarf skýra forgangsröðun til farsældar. Leiðarljós Framsóknar eru vinna, vöxtur og velferð, en þau skapa skilyrðin að farsæld. Því miður höfum við séð atvinnuleysi vaxa án þess að stjórnvöld veiti því sérstaka athygli. Það er verkefni stjórnvalda að skapa skilyrði fyrir fjölbreyttu atvinnulífi um allt land. Aðgerða er þörf.

Ísland hefur notið góðs af alþjóðlegri samvinnu og á að rækta hana áfram í viðskiptum og öryggis- og varnarmálum. Alþjóðasamvinna má aldrei leiða til þess að það verði framsal á forræði yfir auðlindum þjóðarinnar. Fiskimiðin, orkan, landið og vatnið eru undirstaða byggða og sjálfstæðis; þau eru arfur sem við höfum aðeins að láni frá komandi kynslóðum. Við tryggjum bestu lífskjörin á Íslandi með því að tala við heiminn sem fullvalda þjóð sem ræður sjálf yfir auðlindum sínum. Evrópusambandsvegferð ríkisstjórnar Kristrúnar Frostadóttur er óskýr og ómarkviss. Lykilatriði í slíkri vegferð er að ríkisstjórnin sé sammála um markmiðið. Enn er allt á huldu um þjóðaratkvæðagreiðsluna, þ.e. tímasetningu og inntak. Ástæðan er að mínu mati einföld. Ríkisstjórnarflokkarnir hafa afar ólíka sýn á þetta grundvallarmál. Það kann ekki góðri lukku að stýra í stjórnarsamstarfi, því það hefur áhrif á öll önnur mál ríkisstjórnarinnar.

Framtíðin á Íslandi er bjartari, þegar við ráðum okkar málum sjálf. Það sem mestu skiptir fyrir framtíðina er hvort ungt fólk sjái fyrir sér að stofna fjölskyldu á Íslandi. Það er orðið sífellt erfiðara að eignast húsnæði. Það þarf nýjan Lífskjarasáttmála fyrir ungt fólk, sem felur í sér róttækar lausnir sem auka framboð, stytta boðleiðir í kerfinu og gera fólki kleift að komast inn á húsnæðismarkaðinn á hagkvæmari hátt en áður. Allt snýst þetta um að hafa trú á framtíðinni og að ungt fólk finni að það skipti máli og geti mótað landið sem það mun erfa. Með samvinnu að leiðarljósi eru okkur allir vegir færir.

Greinin birtist fyrst í Morgunblaðinu 21. febrúar 2026