Ríkisstjórnin hefur misst tökin á efnahagsmálunum. Allt er dýrara, vextir hækka og verðbólga étur upp ráðstöfunartekjur og eignir heimila. Máttlítil viðbrögð ríkisstjórnarinnar valda vonbrigðum og krafan frá almenningi um raunverulegar aðgerðir er hávær. Þrátt fyrir þetta ástand rukkar Reykjavíkurborg undir stjórn Samfylkingar sífellt hærri fasteignagjöld, jafnvel nú þegar síst skyldi – án þess að nokkur breyting sé á þjónustunni. Þetta er ekki ásættanlegt.
Framsókn í Reykjavík vill bregðast við stöðunni í efnahagslífinu með því að lækka fasteignagjöld í borginni og skila tæpum 800 milljónum til fjölskyldna og fyrirtækja.
Fasteignagjöld taka mið af fasteignamati sem hækkaði um áramótin að meðaltali um tæp 10% á íbúðarhúsnæði og 3,8% á atvinnuhúsnæði í Reykjavík. Önnur sveitarfélög hafa lækkað fasteignagjöldin til að hækkun fasteignamatsins bitni ekki svona harkalega á fólki og fyrirtækjum. Meirihlutinn undir stjórn Samfylkingar hefur hins vegar fellt tillögur okkar í Framsókn um lækkun. Þetta er hrein og klár skattahækkun enda er þjónustan óbreytt.
Ætli þau felli tillöguna?
Framsókn leggur fram í borgarstjórn á morgun skýra og ábyrga tillögu: að lækka álagningarhlutfall fasteignagjalda íbúðarhúsnæðis og atvinnuhúsnæðis frá og með 1. maí. Þannig myndu fasteignagjöld á íbúðarhúsnæði og atvinnuhúsnæði taka mið af 2,5% verðbólgumarkmiði Seðlabanka Íslands til næstu áramóta og því lækka um 800 milljónir. Með því væri verið að setja raunverulegan hemil á skattheimtuna og létta byrðar heimila og fyrirtækja á tímum þar sem hver króna skiptir máli.
Þetta er ekki í fyrsta sinn sem við leggjum þetta fram. Framsókn lagði til í desember að fasteignagjöld yrðu fryst á þessu ári. Sú tillaga hefði skilað um 2,1 milljarði aftur til heimila og fyrirtækja. Sú tillaga var felld.
Í stað þess að hækka skatta ætti borgin að horfa inn á við og sýna ábyrgð. Þegar fjölskyldur og fyrirtæki herða sultarólina ætti borgin ekki að losa um beltið.
Vinnum fyrir íbúa, ekki gegn þeim
Við höfum áður sýnt að þetta er hægt. Þegar ég var borgarstjóri tókum við þá ákvörðun að hækka ekki gjaldskrár þjónustu við börn og fjölskyldur umfram 2,5% til að stuðla að kjarasamningum sem höfðu það að markmiði að skapa svigrúm til vaxtalækkana og ná verðstöðugleika í samfélaginu. Önnur sveitarfélög fylgdu í kjölfarið. Það var rétt ákvörðun þá, samningar tókust og vaxtalækkunarferlið hófst. Það er rétt ákvörðun nú að beita sömu nálgun á fasteignagjöld enda þurfa allir að leggja eitthvað gott til þjóðarsáttar.
Höfuðborgin á að sýna forystu og ábyrgð.
Höfundur er oddviti Framsóknar í borgarstjórn Reykjavíkur.
Höfundur: Einar Þorsteinsson
Greinin birtist fyrst í Morgunblaðinu 13. apríl 2026
