„Við viljum ekki að glaðlegi ljóshærði gæinn græði á kostnað unga fólksins“

„Við þekkjum Klóa, Gotta og fleiri góðviljaða karaktera sem fá börnin okkar til að drekka mjólk og borða ost,“ sagði Halla Hrund Logadóttir, alþingismaður, í ræðu á Alþingi. „En nú er komið að nýjum karakter – glaðlyndum ljóshærðum gæja sem laumar sér inn í huga og líf barna og ungmenna og breytir þeim í nikótínþræla.“

Halla Hrund vísar þar til áróðurs sem fylgir markaðssetningu nikótínpúða, sem hafa tekið verulega upp á sig undanfarið, sérstaklega meðal ungs fólks.

Hættuleg þróun í notkun nikótínpúða

Samkvæmt nýlegum gögnum nota tæplega 40% karla á aldrinum 18-24 ára nikótínpúða daglega. Hjá konum í sama aldursbili er hlutfallið um 20%. Enn alvarlegra sé að vikulega leiti 3-4 börn á bráðamóttöku vegna nikótíneitrunar og fjöldi nýburra sem fæðist í fráhvörfum eftir nikótínneyslu mæðra sé vaxandi.

„Þetta er þróun sem við getum ekki horft fram hjá,“ sagði Halla Hrund. „Þó að þessir framleiðendur hagnist verulega, þá greiðir ungt fólk verðið – bókstaflega með heilsu sinni.“

Óklárað frumvarp og skortur á aðgerðum nýrrar ríkisstjórnar

Tilraunir voru gerðar í síðasta kjörtímabili til að bregðast við þessari þróun. Þáverandi heilbrigðisráðherra Willum Þór Þórsson hóf vinnu við heildarlöggjöf um tóbaksvarnir, ásamt hækkun skatta á nikótínpúða. Frumvarpið komst á þingmálaskrá en hlaut ekki framgang vegna kosninga.

„Það veldur mér miklum vonbrigðum að frumvarpið hafi ekki ratað inn á þingmálaskrá nýrrar ríkisstjórnar,“ sagði Halla Hrund og skoraði jafnframt á núverandi heilbrigðisráðherra að endurvekja málið.

Ungt fólk á betra skilið

Í lok ræðu sinnar lagði Halla Hrund áherslu á forvarnir og ábyrgð stjórnvalda: „Við viljum ekki að glaðlegi ljóshærði gæinn og félagar hans græði á kostnað unga fólksins okkar. Þau eiga betra skilið.“