Framsókn treystir þjóðinni

Íslenskt samfélag stendur nú frammi fyrir áskorunum sem krefjast skýrrar forgangsröðunar. Efnahagslegar aðstæður hafa verið krefjandi, bæði fyrir heimili og fyrirtæki, og margir finna fyrir áhrifum verðbólgu, hárra vaxta og óvissu um þróun atvinnumarkaðarins. Í slíkum aðstæðum er mikilvægt að stjórnvöld einbeiti sér að því sem skiptir mestu máli fyrir daglegt líf fólks: að ná niður verðbólgu og vöxtum, styrkja stöðu heimilanna og tryggja að atvinnuleysi aukist ekki.

Því vekur það spurningar þegar rætt er um að verja miklum tíma og pólitísku afli í þjóðaratkvæðagreiðslu um framhald aðlögunarviðræðna Íslands að ESB. Slík umræða kann vissulega að vera áhugaverð í sjálfu sér og mikilvægt er að virða ólíkar skoðanir á framtíðarskipan Íslands í alþjóðasamstarfi. En á tímum þegar efnahagslegur stöðugleiki er brothættur og heimilin finna fyrir auknum álögum í hverri viku verður að spyrja: Er þetta rétti tíminn til að gera Evrópusambandsmálið að meginefni íslenskra stjórnmála? Að mínu mati er svarið nei. Heldur þarf að vinna markvisst að því að ná niður verðbólgu og vöxtum og skapa stöðugleika í efnahagslífinu. Það er verkefni sem snertir alla landsmenn og hefur bein áhrif á lífsgæði þeirra.

Efnahagsstjórnun snýst að miklu leyti um forgangsröðun. Þegar verðbólga er þrálát og vextir háir verður að beita öllum tiltækum verkfærum til að ná jafnvægi á ný. Það krefst samstillts átaks stjórnvalda, Seðlabanka, atvinnulífs og launafólks. Slík vinna tekur tíma og krefst einbeitingar og skýrrar stefnu.

Þegar stjórnvöld senda óljós skilaboð um efnahagsmálin getur það aukið óvissu og haft áhrif á ákvarðanir fyrirtækja, fjárfesta og launafólks. Í litlu opnu hagkerfi getur slík óvissa haft umtalsverð áhrif. Þess vegna skiptir máli að stjórnvöld hafi skýra sýn á hvaða verkefni eru brýnust.

Umræða um Evrópusambandið verður mjög fyrirferðarmikil. Hún snertir grundvallarspurningar um fullveldi þjóðarinnar, stjórn fiskveiða, orkuna okkar, framtíðarskipan landbúnaðar, gjaldmiðilinn og efnahagsstefnu til lengri tíma.

Ef ákveðið verður að halda þjóðaratkvæðagreiðslu um framhald aðlögunarviðræðna við Evrópusambandið má gera ráð fyrir að næstu mánuðir fari í þá umræðu. Slík staða getur skapað aukna óvissu í hagkerfinu. Fyrirtæki sem taka fjárfestingarákvarðanir horfa ekki aðeins til stöðunnar í dag heldur einnig til þess hvernig efnahagsumhverfið kunni að þróast á næstu árum. Óvissa er einn helsti óvinur efnahagslegs stöðugleika. Óvissa dregur úr fjárfestingu og hægir á atvinnusköpun. Framsóknarflokkurinn leggur höfuðáherslu á betri kjör fyrir heimilin í landinu.

Að þessu sögðu treystir Framsóknarflokkurinn þjóðinni til að taka skynsamlega ákvörðun um framtíð og hagsmuni Íslands.

Greinin birtist fyrst í Morgunblaðinu 7. mars 2026.