Kynning á frambjóðanda: Hjalti Þór Vignisson

Bakgrunnur

Það má segja að ég sé Hornfirðingur í húð og hár.  Er fæddur á Höfn í janúar 1978 og ólst upp í Nesjum og á Mýrum.  Móðurfjölskyldan á djúpar rætur í Nesjunum og föðurfjölskyldan er frá Reykjavík. Hef gaman af margs konar útivist eins og fjallgöngum, skíðum, hjólreiðum og ýmsu öðru.  Ég er kvæntur Guðrúnu Ingólfsdóttur sem ég á fjögur börn með, á aldrinum 12-23 ára.

Starfsreynsla

Eftir nám í Reykjavík og Danmörku rétt eftir aldamót, fluttumst við Guðrún til Hafnar.  Samhliða námi hafði ég starfað við Háskóla Íslands við rannsóknir.  Þegar heim var komið hóf ég störf í ráðhúsi Hornafjarðar, fyrst við stjórnsýslu- og menningarmál og varð síðar ráðinn bæjarstjóri. 

Árið 2013 hóf ég störf við sölu og útflutningi á sjávarafurðum hjá Iceland Pelagic á Höfn, fór síðar yfir á skrifstofu Skinneyjar -Þinganess en síðustu fimm árin hef ég gegnt stöðu framkvæmdastjóra Stormar ehf, sem selur og flytur út bolfiskafurðir.  Stormar er í eigu fjögurra íslenskra sjávarútvegsfyrirtækja.  Stærsta verkefnið undanfarin ár var stofnun og rekstur dótturfélags í Frakklandi sem ég hef veitt forstöðu.  

Í æsku og á unglingsárum fékk ég að taka þátt í margs konar störfum tengdum búskap, ferðaþjónustu, byggingarvinnu og verslun.

Félagsstörf

Í gegnum tíðina hef ég gegnt ýmis konar félags- og nefndarstörfum. Til a[ mynda hef ég setið í aðalstjórn Sindra, í stjórn og svæðisráði Vatnajökulsþjóðgarðs, í stjórn sveitarfélaga á köldum svæðum, starfshópi til að undirbúa tillögu til þingsályktunar um framkvæmdaáætlun í málefnum fatlaðs fólks og starfshópi til að lækka og jafna húshitunarkostnað.

Áhugi á stjórnmálum

Áhugi á stjórnmálum hefur fylgt mér nánast frá fyrstu tíð enda kynntist ég snemma störfum stjórnmálamanna í gegnum setu afa á Alþingi.  Málefni sveitarfélagsins hafa alla tíð verið mér hugleikinn.  

Framboðslisti Framsóknar og stuðningsmanna þeirra samanstendur af hæfileikaríku fólki með ólíkan bakgrunn.  Við viljum vinna að breiðri sátt um stórframkvæmdir á vegum sveitarfélagsins. Við viljum bæði hlúa að vexti atvinnulífs og samfélags í breiðum skilningi.

Við hlökkum til kosningabaráttunnar og samtalsins við íbúa og aðra frambjóðendur í aðdraganda hennar.

Hjalti Þór Vignisson Bæjarstjóraefni og oddviti Framsóknar og stuðningsmanna